कास्कीको माछापुच्छ्रे गाउँपालिका घाचोकस्थित खरीबोटमा मृत अबस्थामा चितुवा भेटिएको छ । पोथी प्रजातिको अन्दाजी चारदेखी पाँच वर्षको उत्तः चितुवा मृत अबस्थामा भेटिएको अन्नपूर्ण संरक्षण क्षेत्र आयोजना(एक्याप) ल्वाङका रेञ्जर रवीन्द्र गौतमले जानकारी दिनुभयो ।
चितुवाको घाँटीमा चोट लागेको छ । प्रारम्भिक अनुसन्धानका क्रममा चितुवा पासोमा परेको देखिएको गौतमले बताउनुभयो ।
“चितुवा मृत देखेर स्थानीयले प्रहरीलाई खबर गरेपछि हामी घटनास्थलमा पुगेका थियौँ । चितुवा पासोमा परेर मरेको देखिन्छ ।” गौतमले भन्नुभयो । अन्नपूर्र्ण संरक्षण क्षेत्र सम्पर्क कार्यालय पोखराका पशु चिकित्सक डा सुरेश नेपालीले घाचोक प्रहरी चौकीमा ल्याएर चितुवाको पोष्टमार्टम गर्नुभएपछि मुचुल्का बनाएर गाडिएको थियो ।
