जिल्ला प्रहरी कार्यालय मकवानपुरले हेटौंडामा सुनका गहना र नगद चोरी गर्ने गिरोह एवं अपहरणको नाटक गर्नेसहित पाँच जना पक्राउ गरेको छ । प्रहरी कार्यालय मकवानपुरका प्रहरी उपरीक्षक सिताराम रिजालले गिरोह पक्राउबारे जानकारी गराउनुभएको हो ।
गत श्रावण ३० गते हेटौंडा उपमहानगरपालिका वडा नं ९ लामसुरेधापस्थित सुशीला साउदको घरमा दिउँसो सुनका गहनाहरु र नगद ५ लाख ३२ हजार चोरी गर्ने गिरोहका ३ जना पक्राउ परेका प्रहरीले जनाएको छ । यस्तै, चोरीका सुन किन्ने एक जना तथा अपहरण भएको भनी लुकेर बस्ने अर्का १ जना पक्राउ परेका रिजालले जानकारी दिनुभयो । पक्राउ पर्नेहरुमा सिन्धुपाल्चोकका भिमलाल लामा, प्रदीप तामाङ, आकाश तामाङ र चोरीको सुन किन्ने काठमाडौंका राजेन्द्र रसाइली छन् ।
यसैगरी अपहरण भएको नाटक गरि लुकेर रकम माग गर्ने मकवानपुर राक्सिराङ्ग वडा नं ५ का कुमार प्रजाललाई पक्राउ गरिएको प्रहरीले जनाएको छ ।
