कास्की जिल्ला टेनिस सङ्घको आह्वान तथा टेनिस अभिभावक संघ कास्कीको निमन्त्रणामा थाइल्याण्डबाट अन्तर्राष्ट्रिय टेनिस प्रशिक्षक कार्लो क्रिष्चयन पोखरा आएका छन् । उनले यहाँका युवा टेनिस खेलाडीहरूलाई एक महिनासम्म टेनिसको प्रशिक्षण प्रदान गर्नेछन् । कार्लोको आगमनसँगै टेनिस कौशलमा थप अभिवृद्धि आउने यहाँका युवा खेलाडीहरुले आशा लिएका छन् । अहिले ८ खेलाडी उनीसंगको प्रशिक्षणमा रहेका छन् । अन्य खेलाडीहरु थपिने क्रममा छन् ।
पोखरा रङ्गशालाको टेनिस कोर्टमा र शिक्षण दिंदै गरेका कार्लोसले पोखरामा टेनिस माहोल निकै राम्रो देखिएको सुनाए । ‘युवा खेलाडीहरूमा टेनिस भोक देखिएको छ तर उनीहरूमा केही ज्ञानको अभाव रहेछ’– उनले भने । कोर टेनिस एकेडेमी बेंककका कार्लोको सँगै सहायक प्रशिक्षकका रुपमा पोखरा आएका रोहित सुनुवारले यो प्रशिक्षणबाट पोखरेली खेलाडीहरूले थप सिप सिक्ने आशा व्यक्त गरे । उनीसंगै प्रशिक्षण कार्यक्रममा सहभागि पोखरेली टेनिस प्रशिक्षक शक्ति शर्माले उनीसंगको सहकार्यमा आफुले सिक्ने ज्ञानलाई भविष्यमा पोखराको टेनिस विकासमा लगाउन सकिने विश्वास व्यक्त गरे ।
कार्लोले मसिनो गरि टेनिसका ज्ञानहरू सिकाएको प्रशिक्षण लिन आएका पोखरेली खेलाडी सृजन भट्टराईले बताए । उनले विहानदेखि साँझ सम्म टेनिसका सैद्धान्तिक, व्यवहारिक तथा मानसिक ज्ञापन प्रदान गर्ने कास्की जिल्ला टेनिस संघका सचिव भिष्मराज पौडेलले जानकारी दिए । यो संगै कार्लोसले यहाँ सञ्चालित ग्रास रुटका खेलाडीहरुलाई पनि हरेक शनिबार प्रशिक्षण दिनेछन् । ‘यो प्रशिक्षणले यहाँका जुनियर खेलाडीहरुमा थप निखारता ल्याउने छ, हाम्रो ग्रास रुट टेनिसलाई पनि सहयोग पुग्नेछ’–पौडेलले भने ।
