असार २८ देखि श्रीलंकामा सुरू हुने एसिसी इमर्जिङ टिम्स एसिया कपमा भाग लिने नेपाली टोलीलाई नेपाल क्रिकेट संघ (क्यान) ले नेपाली टिमलाई सोमबार विहान विदाइ गरेको छ । प्रतियोगितामा नेपालले पहिलो खेलमा पाकिस्तानको ‘ए’ टिमसँग प्रतिस्पर्धा गर्नेछ । एसियाली क्रिकेट काउन्सिल (एसिसी) ले प्रकाशन गरेको खेल तालिकाअनुसार नेपाल र पाकिस्तानबीचको खेल असार २९ मा हुनेछ ।
नेपालले दोस्रो खेल भारतको ‘ए’ टिमसँग साउन १ मा खेल्नेछ । यस्तै युएईको ‘ए’ टिमसँग नेपालको खेल साउन ३ मा हुनेछ । दुई समूहका शीर्ष दुई टिम सेमिफाइनलमा पुग्नेछन् । प्रतियोगिताको फाइनल साउन ७ मा हुनेछ ।
अघिल्ला संस्करणमा एसिसीले टेस्ट राष्ट्रका यू–२३ टिमलाई सहभागी गराउने गरेको थियो । यसपटक भने टेस्ट राष्ट्रसहितका टिमले युवा खेलाडी समेट्दै ’ए’ टिम बनाएका छन् । त्यसैले प्रतियोगिताका कुनै पनि खेललाई एकदिवसीय खेलको मान्यता हुनेछैन ।
