रेवान पोखराको आयोजना, नेपाल पर्यटन बोर्ड र युएनडिपीको सहकार्यमा फुड एण्ड वेभरेज सम्बन्धि तीन दिने तालिम सम्पन्न भएको छ । तालिममा रेवानमा आवद्ध विभिन्न रेष्टुरेण्टका ३० प्रशिक्षार्थी सहभागि थिए । उनीहरुलाई एक समारोहका विच प्रमाण–पत्र वितरण गरिएको छ । समापन समारोहका प्रमुख अतिथि नेपाल पर्यटन बोर्ड, गण्डकी प्रदेशका निमित्त प्रमुख नविन पोख्रेलले दक्षता हाँसिलका लागि तालिम महत्वपूर्ण रहने बताए । पर्यटन क्षेत्रमा दक्ष कामदार भए मात्रै पर्यटकलाई स्तरिय सेवा प्रदान गर्न सकिने उनको भनाई थियो ।
रेवान पोखराका द्वितिय उपाध्यक्ष एवं तालिम संयोजक बसन्त गौतमले पर्यटन क्षेत्रले पश्किने विभिन्न सेवा मध्ये फुड एण्ड वेभरेज एउटा महत्वपूर्ण पक्ष भएको औल्याए । विभिन्न राष्ट्रबाट घुम्न आउने पर्यटकहरु यस विषयलाई गंभिरताका साथ लिने गरेको गौतमको भनाई थियो । रेवान २५ औं सडक महोत्सवको तयारीमा जुटिरहँदा यो तालिम निकै सान्दर्भिक भएको उनले औंल्याए । रेवान पोखराका अध्यक्ष नरेश भट्टराइले रेवानले यसअघि आफ्नों संस्थामा आवद्ध रेष्टुरेण्टका कर्मचारीहरुलाई खाना सम्बन्धि विभिन्न तालिम प्रदान गर्दै आएको बताए ।
तालिमका प्रशिक्षक नेपाल टुरिजम एण्ड होटल मेनेज्मेण्ट कलेजका प्रिन्सिपल प्रकास रेग्मीले एनटिएचएमसीले पोखरामा रहेका पर्यटन सम्वद्ध विभिन्न संघसंस्थासंगको सहकार्यमा विभिन्न तालिममा समन्वय गर्दै आएको बताए । प्रशिक्षार्थीहरुले तालिममा सिकेका ज्ञानलाई व्यवहारमा लागू गर्नेमा आफु विश्वस्त रहेको बताए । जानेका ज्ञान आफु मातहतका साथिहरुलाई पनि सिकाउन आग्रह गरे ।
नेपाल पत्रकार महासंघ कास्कीका उपाध्यक्ष जमुना शर्मा बर्षाले पोखरा जस्तो महत्वपूर्ण पर्यटकिय क्षेत्रका होटल तथा रेष्टुरेण्टहरुले पर्यटकलाई स्तरिय सेवा दिन सक्नुपर्ने औल्याइन् । रेवान पोखराका सल्लाहकार चौबहादुर गुरुङ्गले रेवान पोखरा विगत ३० वर्षदेखि पोखरामा खानाको गुणस्तर बृद्धिमा लागिपरेको बताए । महासचिव विकास भट्टराईले कार्यक्रम सञ्चालन गरेका थिए
