युवा खेलाडीहरुलाई टेनिसतर्फ आकर्षित गर्दै टेनिस खेलको प्रारम्भिक ज्ञान दिने उद्येश्यका साथ कास्की जिल्ला टेनिस संघले विद्यार्थी लक्षित ‘समर टेनिस क्याम्प’ कार्यक्रम सुरु गर्ने भएको छ । ‘लेट्स लर्न टेनिस’ भन्ने नाराका साथ यहि चैत्र १६ गतेबाट समर क्याम्प सुरु गर्ने भएको हो । तीन साता सम्म सञ्चालन हुने ‘समर टेनिस क्याम्प’ वार्षिक परिक्षा दिएर बसेका बालबालिका लक्षित कार्यक्रम भएको आयोजक संघका अध्यक्ष राजकुमार गुरुङको भनाई छ ।
संघले टेनिस विकासका लागि ग्रास रुट लेभलको प्रशिक्षण सुरुवात गर्ने योजना अनुरुप समर क्याम्पको कार्यक्रम अघि सारेको हो । समर क्याम्पमा ६ देखि १४ वर्ष भित्रका बालबालिका लाई प्रशिक्षण दिइने बताइएको छ । टेनिसका अनुभवि प्रशिक्षकहरु कुमार अधिकारी, निरज थापा, शक्ति शर्मा लगायतले प्रशिक्षण प्रदान गर्नेछन् । फुर्सदमा बसेका विद्यार्थीले समयको सदुपयोग गर्न यो क्याम्प उपयुक्त हुने प्रशिक्षक कुमार अधिकारीको भनाई छ । संघले विगतका वर्षहरुमा पनि यो कार्यक्रम गर्दा रंगशालाको टेनिस कोर्ट टेनिसमय बन्ने गरेको थियो । यसपटक पनि अपेक्षा उस्तै रहेको अर्का प्रशिक्षक निरज थापा बताउँछन् ।
